حكايتى مع الحاج محمود بويا

فى يوم كنت قاعد أنا وشوية من زمايلي في الكفاح والجهاد في كافيتريا ( عبد الغنى ) وكنا قاعدين نكركر ونشرب وناكل و بنضرب شوية حاجات كده عالماشي أنا وزمايلي المجاهدين

...و يا دوب أنا خلصت كام حتة الجاتوه بتاعتي ونص التورتة بتاعت الواد حسام وشربت النسكافيه بتاع الواد علوى وأكلت الكيكه بتاعت الواد الفلته والدنش بتاع الواد عمرو وشربت عصير المانجه بتاع الوادمحمد وأخدت شفطتين عالطاير من عصير الجوافة بتاع الواد الجنيس
ولساه هاضرب عصير الدووم بتاع الواد حجاب بصيت في الساعه لقيت الساعه بقت واحده
قولت يا نهار أسود أبويا زمانه مولع في البيت حريقة دلوقتى وهايطلق أمى بسببي
لازم أروح حالآ الا ابويا هايطلع البلا علي جتتى
لأنه محذرني ييجي خماشر تماشر مرة كده أنى ما أتأخرشي برة البيت لبعد الساعه اتناشر
قولت للعيال زمايلي سورى يا مكافحين انا هاضطرأخد عصيرالدووم تيك اواي علي السريع
لأنى لازم أروح حالآ دلوقتى أهوه الا يومي باين عليه فوحلقي غامق وابويا هايطين عيشتي

وضربت عصير الدوم علي بوق واحد وأخدتها طيران لحد بيتنا

وفتحت باب الشقه بشويش خالص وروحت قافله بمنتهى خفه اليد ( ولا أجدعها حرامى شقق ) ومن غير معمل صوت خالص

وبلف ورايا لقيت الحاج ( محمود ) أبويا
لفيت لقيته في وشي -- ولقيته ماسك الكرسي الخشب اللى عندنا ولسه بيرفعه من على الارض وهايهبدنى بيه علي نافوخى --

روحت بسرعه الصاروخ عامل شقلباظ أرض جو وروحت جاري علي أوضتى
وناطت فوق السرير ومن فوق السرير قفزه لولبيا إنتحاريه شقلباظية لفوق الدولاب
( وطبعآ عامل الخبره واللياقه البدنية وغريزه البقاء والمحافظة علي الروح هما اللى لعبوا دور البطولة هنا

ونصيحه منى ماتجربوش الحكايه دي عشان تقريبا كده دراعي إتملخ وضهرى طق ورجلي إتلوحت وجالي لمباجو وارتجاج مخ علي خفيف ههههههههههه )
قولت لأبويا : معلش يا حاج انا عارف إنى اتأخرت بس أصل عربية خبطتنى في الشارع

الحاج : عربية يا روح أمك .. أنا أعرف اللي عربيه تخبطه ده يموت .. يتنيل علي عين اللى جابه ويتعور لكن مايدخلش البيت الساعه واحده بالليل
أمي : أنت كنت فين يا واد أنت كل ده .. يوه !! ايه اللي مطلعك فوق الدولاب كده

قولتلها : أصل خابطة العربيه أثرت علي نافوخى وخلتني أتخيل إني بقيت نسناس أو قرد

الحاج : أنت هتنزل يالاه أنت ولا اكسر الدولاب ده على نفوخك
قولت لأمى : شوفتي يا أما عايز يكسر عفشك إزاى هو مش مكتوب عليه في القايمة إلحقي بقا إشتكيه بسرعه وشحطتيه في المحاكم
امي : يا بنى إحنا قعدنا مستنينك عالعشا ولما اتاخرت قلقنا عليك أنت أتعشيت بره ولا إيه ؟

الحاج : وهو ده اللى هامك أتعشيت ولا لأ .. ماهو ده اللى أنتى فالحه فيه عماله تعلفي فيه لحد مابقي زي البغل أهو
قولتلها : ربنا يخليكي ليا يا أما وتعلفي فيا كمان وكمان بوصي إنا هانزلك بعد بكرة عالضهر كده

.. إبقي إعمليلي ساندويتش بسطرمة ولا هوت دوج أتصبر بيه
أمي : وهوا فيه قرود بتآكل بسطرمة ولا هوت دوج برضه ؟
قولتلها : أه يا أما فيه .. بياكلوا هوت دوج وساعات دوج من غير هوت كمان .
.
أنتى هاتتريقي يا أما .. أمري لله طب إبقي إعمليلي بقا ساندوتش موز ... ولا ساندويتش فول سوداني ... ولا فول بالزيت الحار .. او فول بزيت العربيات بس بلاش زيت موبيل ألا بيحرق عالصدر يا أما ..

الحاج : أه ماهو أنت مش فالح غير في التريقه .. إنا مش قلتلك ياض ميعادك الساعة اتناشر وماتتأخرش لا أطين عيشتك
( هههههه عشم بيني وبين الحاج بس مش أكتر )

قولتله : ماهو بصراحة بقى يا حاج الساعه عشره دي بدري قوي يعني وبعدين ما بالحقش أخرج ولا بالحق أتفسح مع أصحابي
الحاج : وكمان مش عاجبك وبترد عليا .. حد يجبلي سلم اطلع افتح دماغ الواد ده ولا اغزه مطوة وأخلص منه .. أنا عملت إيه يا ربي ترزقنى بالبلوة دى
قولتله : شوف بقا انت عملت إيه في دنيتك .. شكلك كده كنت منيل الدنيا يا حاج هههههههههه
الحاج : بتتريق .. حد يجيبلي سلم لما أطلع أجيبه علي جدور رقبته من فوق الدولاب ..

قولت : لا لا لا اوعوا حد يجيب السلم ولمي كل المطاوى اللى في البيت يا أما وأبعدي أى سلاح أبيض من وش الحاج دلوقتى حتى لو قصافة ضوافر
.. اتناشرايه اللى بتقول عليها دى يا عم الحاج بلاش كلام فارغ .. هوه الساعه تسعه حلو قوي ولو تمانية يكون أحلي واحلي ..
خلي الواحد ينام بدرى طب ده حتى النوم بدري صحى ومفيد ..
الحاج : صحي ومفيد يا عسل أنت هاتعملي فيها الشيف اسامة السيد ..

طب وديني لا أنا قاعدلك هنا لما نشوف إيه أخرتها ولما أشوف هاتنزل إمتى سيادتك من فوق الدولاب ....

وطبعا يا جماعة أنا حاليآ عايش ومتعايش أكل وشرب ونوم فوق الدولاب من أمبارح ومعايا الكمبيوتر بتاعي بس مسيري هنزل أروح أستحمى ولا ادخل التواليت بدل ما اغرق المنتدى
...والحاج أجازه وقاعد اليومين دول في البيت وقاعدلي علي الكرسي تحت الدولاب....
اعمل إيه في المشكلة دي
وأنا عايز انزل وباقصي سرعه ربنا ما يوزنقكم زنقتى ههههههههه
شوفولي بقي حل بسرعه ..
ههههههههه
وأنا حذرتكم اهوه وماليش دعوة
يلا سلام بقا
سلامو عليكو

هههههههههههه
وعليكم السلام
الواحد مش عارف والله يرد على ايه ولا ايه
دا انت عظمه بالصلا ع النبى اه والله ربنا يحميك اكل اصحابك وكلته والعصير متاخر ولازم تشربه
انت استاذ و رئيس قسم مش مهندس هههههههه
انت احسن لك تفضل فوق الدولاب على طول

هههههههههههههه
عندك حق يانظرة
انت احسنلك تفضل
زى منتا احسن متنزل
وتاخد علقه محترمة من
عم الحاج محمودوده جزاتك
عشان متبقاش تتاخر بره
تانى وعملى فيها مكافح
بكرة تخش الجيش وتبقى مكافح
بجد ويسلام بقى على الجيش
ههههههههههههههههههههه

نورتو كلكم ياجماعه والله
وارائكم بسم الله ماشاء الله

ههههههههههههه
اى خدمة احنا موجودين

nice

نايس
شكلك لقيته طويل كسلت تقراه

منور ياحاج شيتوس
ههههههههههههه